Mae'r datblygiadau tai ar gyn safle Rhondda Bowl a'r Warws Ffrwythau yn Nhonyrefail yn dechrau dod yn eu blaenau, gyda fforddiadwyedd, effeithlonrwydd ynni a datgarboneiddio wrth wraidd y gwaith.
Mae'r ddau gynllun yn ddatblygiadau Cymdeithas Tai Newydd sy'n cynnig cyfanswm o 34 o gartrefi newydd i bobl leol.
Wedi'i adeiladu mewn partneriaeth â Chyngor Rhondda Cynon Taf a'i ariannu'n rhannol gan Grant Tai Cymdeithasol Llywodraeth Cymru, bydd yr hen Warws Ffrwythau yn cynnig 14 o fflatiau un ystafell wely i'w rhentu.
Bydd yr ail ddatblygiad ar gyn safle Rhondda Bowl yn cynnig cymysgedd o fflatiau un ystafell wely, tai dwy a thair ystafell wely am rent fforddiadwy.
Mae'r ddau ddatblygiad tai i fod i gael eu cwblhau yn 2025 gan y contractwyr Grŵp Castell.
Ar ôl cael caniatâd cynllunio yn 2023, bydd y cartrefi newydd hyn yn cael eu dylunio i fodloni’r safonau amgylcheddol diweddaraf a bydd ganddynt Dystysgrif Perfformiad Ynni ynni-effeithlon gradd A oherwydd system wresogi nad yw’n danwydd ffosil.
Dywedodd Louise Davies, Cyfarwyddwr Iechyd Cyhoeddus, Diogelu a Gwasanaethau Cymunedol Cyngor Rhondda Cynon Taf: “Mae tîm Strategaeth Tai’r Cyngor wedi gweithio’n agos gyda Chymdeithas Tai Newydd i ddylunio’r ddau gynllun hyn yn Nhonyrefail, sy’n ymateb i’r angen lleol am dai. Bydd y 34 o dai fforddiadwy newydd yn cael eu datblygu i Safon Ansawdd Tai Cymru a bennwyd gan Lywodraeth Cymru a bydd yn dod â buddsoddiad o tua £5m i’r ardal drwy’r Grant Tai Cymdeithasol.
“Rwy’n edrych ymlaen at weld y ddau gynllun yn gwneud cynnydd pwysig yn yr wythnosau a’r misoedd nesaf. Ar ôl eu cwblhau yn 2025, bydd pob un yn darparu opsiynau tai o ansawdd uchel a fydd yn cael eu dyrannu drwy gynllun gosod y Cyngor ar sail dewis.”
Dywedodd Jason Wroe, Prif Weithredwr Newydd, “Rydym yn edrych ymlaen at adeiladu mwy o dai fforddiadwy yn Nhonyrefail. Bydd y cynllun gwych hwn nid yn unig yn helpu i gyfrannu at gyrraedd ein targedau sero net ond bydd hefyd yn darparu cartrefi diogel, cynnes a fforddiadwy i breswylwyr. Rydym yn edrych ymlaen at weld y cartrefi gorffenedig hyn yn 2025 ond yn y cyfamser hoffwn ddiolch i’n holl bartneriaid sydd wedi gweithio’n galed i’n cael ni i’r cam hwn.”
Dywedodd Dorian Payne, Rheolwr Gyfarwyddwr Grŵp Castell, “Rydym yn ymroddedig i gael effaith ystyrlon mewn cymunedau fel Tonyrefail. Rydym yn falch o fod wedi partneru gyda Newydd ar ein prosiectau parhaus yn Heol Waunrhydd a Bryn Rhedyn. Mae'r bartneriaeth hon yn enghraifft o'n hymrwymiad i ddarparu cartrefi o ansawdd uchel i'r rhai mewn angen. Gyda gwaith sylfaen yn mynd rhagddo a gwaith yn dod yn ei flaen yn gyflym ar y ddau ddatblygiad, rydym yn falch o fod yn cyfrannu 34 o gartrefi gradd A EPC ar gyfer rhent cymdeithasol, gan helpu i leihau'r rhestrau aros am dai yn yr ardal hon. Mae Newydd a Grŵp Castell wedi ymrwymo i greu effaith gadarnhaol ar draws y gymuned a byddwn yn cyflawni hyn trwy weithio gydag isgontractwyr a chyflenwyr lleol, sefydlu rhaglenni hyfforddi a phrentisiaeth, a buddsoddi yn yr ardal leol trwy ein mentrau ymgysylltu cymunedol. Edrychwn ymlaen at weld y datblygiadau hyn yn ffynnu a byddwn yn rhannu mwy o ddiweddariadau yn y misoedd nesaf.”
Ymhlith aelodau eraill y tîm dylunio a gyflogir ar y cynlluniau tai hyn mae Kennedy James Griffiths, Phoenix Design, Betts, Geraint John Planning, I&G Ecology, Geldards, Morgan LaRoche, Cooke & Arkwright, Strongs Partnership a Taylor Lewis.
Y gobaith yw y bydd y cartrefi hyn wedi'u cwblhau yn ystod haf 2025. Mae angen i breswylwyr sydd â diddordeb mewn rhentu'r eiddo hyn gofrestru gyda HomefinderRCT i wneud cais.
Llun
Yn y llun uchod mae Cynghorydd Bob Harris (rhes cyntaf trydydd or dde), Aelod Cabinet dros Iechyd y Cyhoedd a Chymunedau yn ymweld â'r cyn Rhondda Bowl ar 12 Ebrill ynghyd â Maer Rhondda Cynon Taf (rhes cyntaf, pedwerydd or dde), cydweithwyr o Gyngor RhCT, Grŵp Castell a Chymdeithas Tai Newydd.
