Mae Grŵp Tai Cadarn wedi cyhoeddi penodiad Debbie Green yn Gadeirydd newydd ei Fwrdd. Bydd yn goruchwylio gwaith y Grŵp o ddarparu cartrefi cymdeithasol fforddiadwy a gwasanaethau tai rhagorol i gymunedau ledled de a chanolbarth Cymru.
Mae gan Debbie brofiad arweinyddiaeth helaeth ar draws y sector tai yng Nghymru ac mae'n dod â'i hymrwymiad cryf i ddarparu cartrefi diogel o ansawdd uchel, ynghyd â chanlyniadau cadarnhaol i breswylwyr a staff. Yn ei rôl flaenorol fel Prif Weithredwr Grŵp Beacon Cymru, arweiniodd y broses o uno Grŵp Tai Coastal ac RHA Wales yn llwyddiannus i greu Beacon, un o gymdeithasau tai mwyaf Cymru.
Grŵp Tai Cadarn yw'r sefydliad rhiant i Gymdeithas Tai Newydd a Chymdeithas Tai Cadwyn, sy'n darparu tai cymdeithasol fforddiadwy, diogel ac o ansawdd uchel i gymunedau. Gyda'i gilydd, mae'r Grŵp yn rheoli tua 5,000 o gartrefi ar draws chwe sir yn ne a chanolbarth Cymru.
Wedi dechrau ei gyrfa fel cyfrifydd siartredig gyda PwC, mae Debbie wedi gweithio ar draws y sectorau preifat, cyhoeddus a thrydydd sector ledled Cymru. Mae hefyd yn gyn-Gadeirydd Tai Cymunedol Cymru ac ar hyn o bryd mae'n gwasanaethu fel Ymddiriedolwr gyda'r elusen iechyd meddwl flaenllaw, Platfform. Mae ei phrofiad amrywiol wedi ei gweld yn arwain sefydliadau drwy gyfnodau o newid sylweddol.
Wrth dderbyn y rôl, dywedodd Debbie, "Mae'n wych cael fy mhenodi'n Gadeirydd Cadarn ac rwy'n edrych ymlaen at weithio gyda phreswylwyr, cydweithwyr newydd a gweddill y Bwrdd wrth i ni arwain y sefydliad i'w gyfnod cyffrous nesaf.
“Alla i ddim aros i fynd allan i gyfarfod mwy o breswylwyr a deall yn iawn beth sy'n bwysig iddyn nhw a'u cartrefi.
“Ar ôl gweithio yn sector tai cymdeithasol Cymru ers blynyddoedd lawer, rwy'n gyfarwydd ag enw da Cadarn, nid yn unig am ddarparu cartrefi o safon ond hefyd am roi preswylwyr wrth galon popeth y mae'n ei wneud. Mae'n bwysig adeiladu ar hynny a sicrhau bod lleisiau preswylwyr yn ganolog i'n gwaith, fel y gallwn barhau i fuddsoddi mewn cartrefi presennol, datblygu tai fforddiadwy newydd, a darparu gwasanaethau gwell sy'n helpu ein cymunedau i ffynnu.”
