Mae preswylwyr newydd yng Nghwmbach yn dathlu ar ôl derbyn allweddi eu cartrefi newydd sbon ar hen safle Ysgol Gynradd Cwmbach.
Bydd y datblygiad o 17 byngalo fforddiadwy carbon isel gan Gymdeithas Tai Newydd yn helpu i ddiwallu anghenion tai lleol, ac mae'r cartrefi wedi'u darparu i bobl sy'n chwilio am dai drwy restr dai Cyngor Bwrdeistref Sirol Rhondda Cynon Taf.
Mae'r cartrefi wedi rhoi hwb i economi ac amgylchedd lleol De Cymru. Cafodd strwythurau ffrâm bren y cartrefi eu hadeiladu gan Celtic Offsite yn eu ffatri yng Nghaerffili, cyn cael eu cwblhau ar y safle gan gontractwyr M&J Cosgrove er mwyn lleihau'r effaith amgylcheddol. Cafodd y byngalos hefyd eu hadeiladu gyda systemau gwresogi di-danwydd ffosil a phaneli solar i leihau eu hôl troed carbon a chostau ynni i breswylwyr.
Mae murluniau o'r hen ysgol fabanod wedi'u cadw ar waliau'r stad i gysylltu'r datblygiad â'i hanes.
Mae’r datblygiad hwn yn bosibl diolch i gydweithrediad helaeth rhwng Newydd a'i bartneriaid, Cyngor Bwrdeistref Sirol Rhondda Cynon Taf, M&J Cosgrove Construction, a Llywodraeth Cymru.
Yn y digwyddiad trosglwyddo ddydd Mawrth diwethaf i nodi cwblhau'r datblygiad, dywedodd Rhian Lees, Prif Reolwr Prosiectau Newydd, "Mae darparu cartrefi fforddiadwy a chynaliadwy sy'n diwallu anghenion y gymuned wrth wraidd popeth rydym yn ei wneud, ac rydym wrth ein bodd bod y cartrefi hyn bellach wedi'u cwblhau ac yn barod ar gyfer preswylwyr newydd yng Nghwmbach. Mae hwn yn enghraifft wych o'r hyn y gellir ei gyflawni pan fydd partneriaid yn gweithio tuag at nod cyffredin, ac rydym yn edrych ymlaen at weld y cartrefi hyn yn cyfrannu at gymuned ffyniannus yng Nghwmbach."
Ychwanegodd Gary Cosgrove, Cyfarwyddwr M&J Cosgrove Construction, "Rydym wrth ein bodd ein bod wedi cwblhau a throsglwyddo'r prosiect gwych hwn yn llwyddiannus ar gyfer ein cleient, Cymdeithas Tai Newydd.
"Mae'r garreg filltir hon yn adlewyrchu cryfder ein partneriaeth a'n hymrwymiad ar y cyd i ddarparu cartrefi o safon uchel sy'n diwallu anghenion tai brys ac yn creu lleoedd gwych i denantiaid fyw ynddynt.
“Prosiect gwych, partneriaeth wych ac, yn bwysicaf oll, cartrefi a fydd yn gwneud gwahaniaeth gwirioneddol."
Dywedodd y Cynghorydd Mark Norris, Aelod Cabinet dros Adfywio a Thai yng Nghyngor Bwrdeistref Sirol Rhondda Cynon Taf, "Mae'n wych gweld y 17 cartref fforddiadwy newydd hyn wedi'u cwblhau ac yn barod i groesawu preswylwyr yng Nghwmbach. Mae datblygiadau fel hyn yn chwarae rhan bwysig wrth ein helpu i ddiwallu anghenion tai lleol, gan sicrhau bod unigolion a theuluoedd yn gallu cael mynediad at gartrefi ynni-effeithlon o safon uchel o fewn eu cymunedau. Mae'r prosiect hwn yn dangos gwerth gweithio mewn partneriaeth gref rhwng y Cyngor, Cymdeithas Tai Newydd a Llywodraeth Cymru, ac rwy'n falch ein bod gyda'n gilydd wedi darparu cartrefi cynaliadwy a fydd o fudd i breswylwyr am flynyddoedd lawer i ddod."
